Ang Katotohanan Ay Ilog-Dabaw

Ang katotohanan ay parang tapon:
		Ilubog mo't lulutang din
		Pagdating ng panahon.
 Kasabihang Ifugao

Ang katotohanan ay ilog-Dabaw:
Higit itong nakauunawa
Sa anyo ng taong nasa pagitan
Ng buhay at kamatayan,
Dinig nito ang unang lagutok ng bungo,
Saksi nito ang huling pulandit ng dugo
Sa dilim, sa tabing damuhan.

Ang katotohanan ay ilog-Dabaw:
Sinapupunan itong tapunan 
Ng sanggol na bangkay;
Nilalanggas nito ang walat na ari
At binabanlawan ang duguang panloob
Ng mga babaeng dinaan sa dahas
At itinapon sa ilalim, sa kaburakan.

Ang katotohanan ay ilog-Dabaw:
Iniluluwa nito sa liwanag
Ang ipinalamon sa dilim;
Isinusuka sa ibabaw
Ang nilunok nang walang pagtikim,
Ikinapamimilipit ng bituka
Ikinaduduwal ng sikmura't lalamunan
Ikinauurong ng dila't ikinahihilam ng mata
Ang pilit na paglulon at pagkuyon
Sa malansa at makunat na kasinungalingan.